Таныс ойнақы әуендер, романтикаға толы әндер мен биден жинақталған  «Ритмы Latinos» концерттік бағдарламасы әр көрерменнің жүрегінен орын алды. Олар әдемі би ырғағына бөленіп, орындалған әндерді қосыла шырқады.

Концерттік бағдарлама  камералық хордың  (жет.Галина Колесникова) орындауында «Цветок мимозы» бразилия халық әнімен ашылды. Ал «Мәдениет саласының үздігі» Валерия Болиева гитараның сүйемелдеуінде Э.Вилла-Лобостың «Бразильская бахиана» әнін, Аягөз Қалмағанбетова Ж.Бизенің «Кармен» операсынан хабанера орындады. Сонымен қатар   Марина Зяблинцеваның орындауында Наталья Орейроның «Cambio dolor» би әні, Серікболсын Бекмолдинның орындауында Консуэло Веласкестің «Besame Mucho» сынды романтикаға толы, танымал, хит  әндер көрермендер назарына ұсынылды.

Композиторлар Владимир Сидоров пен Георгий Свиридовтың аспаптық музыкаға арналған  төл туындылары Әлібек Ахмалишев (гитара), Эльдар Минюков (фортепиано), Наталья Грицаеваның (фортепиано) жеке және ансамбльдік орындауында тыңдармандарға тарту етілді.

Эльмира Камарницкая дирижер Жанат Рашиттың жетекшілік етуімен камералық ансамбльдің сүйемелдеуінде Астор Пьяццолланың «Yo soy Maria» әнін, Аягөз Қалмағанбетова  «Запах женщины» фильміндегі әнді орындап, көпшіліктің ыстық ықыласына бөленді.

Латын американдық музыка стиліндегі кеш би мен тангосыз өтпейтіндігі баршаға аян. «Гәкку» би ансамблінің солистері: Анель Серікбаева, Нәзира Ташмағамбетова мен Гүлбахрам Тұрсынбек әншілердің музыкалық нөмірлерін  көздің жауын алатын билерімен безендірді. Ал көпшілік Дарья Чубарованың жеке орындауында танго биін тамашалап, жоғары баға берді.

Сахнаға жаңа музыкалық аспапшылар тобы-бендтің (ұрмалы аспаптар, клавиша, гитара) шығып, өнер көрсетуі көрермендер үшін тосынсый болды. Саида Сағди, Эльмира Камарницкая бендтің сүйемелдеуімен Карлос Альмаран мен Серхио Мендестің испан әуендерін, ал Әйгерім Дәулетхан «Брат или брак» фильмінен «Тағы да сүй»   әнін орындады.